క్రిప్టో కుబేరులొచ్చారు తొలిసారిగా ప్రచురించిన ఫోర్బ్స్‌ క్రిస్‌ లార్సెన్‌కు అగ్రస్థానం

క్రిప్టో కుబేరులొచ్చారు 
తొలిసారిగా ప్రచురించిన ఫోర్బ్స్‌ 
క్రిస్‌ లార్సెన్‌కు అగ్రస్థానం

న్యూయార్క్‌: ఫోర్బ్స్‌ తొలిసారిగా క్రిప్టోకరెన్సీ కుబేరుల జాబితాను విడుదల చేసింది. అంటే కేవలం క్రిప్టోకరెన్సీ(ఊహాజనిత కరెన్సీ) ఆధారంగా అత్యంత ధనవంతులైన వారికి ఇందులో చోటు ఉంటుందన్నమాట. జాబితాలో 7.5-8 బిలియన్‌ డాలర్ల(దాదాపు రూ.48750-52,000 కోట్లు)తో రిపుల్‌ సహ వ్యవస్థాపకుడు క్రిస్‌ లార్సెన్‌ అగ్రస్థానంలో నిలిచారు. బ్లాక్‌చైన్‌ సాంకేతిక ఆధారంగా సీక్రెట్‌ ఆల్గారిథమ్స్‌ను ఉపయోగించి ‘తవ్వితీసేవే’ ఈ క్రిప్టోకరెన్సీలు. వీటిపై ఎవరికీ నియంత్రణ ఉండదు. ఇటీవలి కాలంలో భారీ లాభాలతో ఇవి ప్రపంచం దృష్టిని ఆకర్షించిన సంగతి తెలిసిందే. ఫోర్బ్స్‌ ప్రకారం..  
* చాలా ఎక్కువగా ఉపయోగించే బిట్‌కాయిన్‌, ఈథెరీమ్‌, ఎక్స్‌ఆర్‌పీల సగటు ధర గతేడాదిలో ఏకంగా 14,409 శాతం పెరిగింది. 
* ప్రస్తుతం 1500 క్రిప్టోకరెన్సీలు ఉండగా.. వాటి విలువ 550 బిలియన్‌ డాలర్లు(రూ.35.75 లక్షల కోట్లు)గా ఉంది. 2017 ప్రారంభంతో పోలిస్తే ఈ విలువ 31 రెట్లు ఎక్కువ కావడం గమనార్హం. 
* జోసెప్‌ లుబిన్‌(1-5 బి. డాలర్లు), చాంగెపెంగ్‌ జో(1.1-2 బిలియన్‌ డాలర్లు), కామరాన్‌ అండ టైలర్‌ వింక్‌లీవాస్‌(900 మి. డాలర్లు-1.1 బి. డాలర్లు)లు జాబితాలో చోటు దక్కించుకున్నారు. 
* ఇంకా బ్రియాన్‌ ఆమ్‌స్ట్రాంగ్‌, మాథ్యూ రోజక్‌, ఆంటోనీ డి లారియో, బ్రోక్‌ పియర్స్‌, మైఖేల్‌ నోవోగ్రాజ్‌, బ్రెండన్‌ బ్లమర్‌, డాన్‌ లారిమర్‌, వాలరీ వావిలోవ్‌, ఛార్లెస్‌ హాస్కిన్సన్‌, బ్రాడ్‌ గార్లింగ్‌హౌస్‌, బారీ సిల్బర్ట్‌, విటాలిక్‌ బ్యూటరిన్‌, టిమ్‌ డ్రాపర్‌, సాంగ్‌ చి-హ్యుంగ్‌ తదితరులూ ఉన్నారు. 
* క్రిప్టోకరెన్సీ కుబేరుల సగటు వయసు 42 కావడం గమనార్హం. అదే ఫోర్బ్స్‌ 400 అమెరికా కుబేరుల సగటు వయసు 67గా ఉంది. 
భారత్‌లో క్రిప్టోకరెన్సీ చట్టబద్ధం కాదని బడ్జెట్‌లో ఆర్థిక మంత్రి అరుణ్‌ జైట్లీ స్పష్టం చేసిన విషయం తెలిసిందే.